De par le roy.

Chiers et bien amez, vous avez dès longtemps sceu et congneu comme pour le bien, paix et tranquilité de nostre royaume et de noz bons et loyaulx subgectz, nous sommes par cy devant mis en tout devoir pour à nous radrecer et redimer nostre très chier et trés amé frere le duc de Guyenne.

Et pour plus monstrer par effect le bon vouloir que avons à luy, luy avons puis nagueres baillé la dicte duché de Guyenne, et autres terres et seigneuries pour son partage et appanage (a), dont il a esté bien contant, et depuis, pour du tout asseurer l'amour et union d'entre nous et luy, ayent les choses esté tellement approchées d'un costé et d'aultre que au lieu appellé le Port Bereau, scitué et assis en noz pays et conté de Poictou, nostre dit frere est venu devers nous, par deux foys (b), et nous a très humblement supplié et requis que nostre plaisir fust le recepvoir en nostre bonne grace, et luy pardonner et oublier toutes choses passées ; ce que liberallement luy avons octroyé, et ne faisons aucun doubte que doresnavant nostre dit frere ne se conduise envers nous en toutes choses ainsy que bon frere doibt faire envers son roy et souverain seigneur.

 En quoy faisant n'est pas nostre intencion, pour quelque chose qui puisse advenir, de jamais l'esloigner de nostre grace, mais en icelle l'entretenir fermement et inseparablement; et pour ce que doresnavant luy voulons bien communicquer les faiz et affaires de nostre royaume, sommes venus au lieu de la Taffardiere, de Maigné et de Coulonges (c), près de Nyort, où nostre dit frere est venu de rechief devers nous, et y avons esté et serons ensemble par aucun temps, pendant lequel est bien nostre intention de luy communicquer nos dictes affaires.

Et ce fait, sommes deliberez nous en aller en nostre pays de Tourayne, auquel lieu nostre dit frere nous a voulu conduire et accompagner, ce que ne luy avons voulu souffrir, obstant ce que encores il n'a esté en la pluspart des pays que luy avons baillez pour son dit appanage; mais sytost qu'il y aura esté, qui sera de brief, il s'en viendra incontinent devers nous au dit pays de Tourayne ou aillieurs, quelque part que soions.

Sy vous voulons bien advertir de ces choses, affin que congnoissiés au vray que nostre dit frere s'est reuny et rejoinct avec nous, ainsy qu'il devoit, et par telle et si bonne maniere que sans quelque difficulté en sommes très contans.

 Donné à Coulonges la Royal, le XIIIIe 1 jour de septembre.

Septembre 1469 Louis XI avec son maréchal Jacques de Brézé, comte de Maulévrier à la commanderie de Cenan de Benet <==.... ....==> Novembre 1469 Concession de Louis XI à Pierre Laigneau, écuyer, seigneur de la Morinière à Dissay

....==> Janvier 1473. Permission à Jean d'Estissac de réédifier les châteaux et fortifications de Coulonges-les-Royaux et du Bois-Pouvreau, qui avaient été rasés par ordre du roi, ledit sr d'Estissac ayant été traité en rebelle lorsqu'il était au service de Charles duc de Guyenne.