Charles par la grâce de Dieu roy de France.

Scavoir faisons à tous présens et avenir que nous, ayant en mémoyre les hauls et recommandables services que nous a faiz et fait de jour en jour ou fait de nos guerres et autrement nostre amé et féal chevalier, conseiller et chambellan Giles, sieur de Raiz, mareschal de France, et les grans périlz et dangiers esquels, pour nostre propre fait et querelle et pour la conservacion de noustre couronne et seignorie, il a exposé maintes foiz et moult chevaleureusement sa personne en bien démoustrant sa vaillence et bonne affection, comme à la prinse du Lude et autres pluseurs beaulx faiz, au lièvement du siège que tenoient naguères devant la ville d'Orléans les Angloys, anciens ennemis de nostre royaulme et seignorie, à la journée aussi et bataille de Patay, où, après ledit siège levé, nosdiz ennemis ont esté desconfiz et depuis, en l'armée que naguères avons faicte tant en la ville de Reims, pour noustre couronnement et sacre que autre part oultre la rivière de Seine, pour la recouvrance de pluseurs noz païs que adonsques occupoient nosdiz ennemis lesquels païs, par le bon aide et loyal service que nous y a fait ledit mareschal et autres noz chiefs de guerre et vassaulx en la compaignie de pluseurs des seigneurs de nostre sang qui nous y ont aussi accumpaignez et scrviz, nous avons, l'aide de Dieu tousjours devant réduiz et remis en nostre obéissance ayant esgart aussi aux grans noblesces et seignories que tient dès à présent et plus tiendra par succession en noustredit royaume et seignorie ledit sire de Raiz qui est et noble hostel dont il est à présent chief.

A icelui sire de Raiz, pour ces causes et considérations et plusieurs autres à ce nous mouvans et à ceste [intention] que de ses diz recommandables services soit mémoire perpétuel, avons de noustre certaine science octroyé et octroyons de grâce espéciale, plaine puissance et auctorité royale par la teneur de ces présentes, [que, pour] l'annoblissement de ses armes et accroyssement d'onneur, pour lui, sa postérité et maison il puisse et lui loise avoir de porter à tousjours mais l'escuçon de sesdites armes une orleure de noz armes en laquelle aura fleurs de liz d'or semées sur champ d'azur, ainsi et par la forme et manière qu'il est en cest endroit pourtrait, figuré et armoyé.

Et icelle orleure de noz armes lui avons donnée et donnons par cesdictes présentes, voulons et octroyons que d'icelles armes et de noustre dict octroy lui et les siens qui devront porter ses dites armes joïssent et usent à tousjours mais perpétuellement et les puissent porter ainsi que dessus est dit pourtraict et figuré, sans ce que, ores ne pour le temps à venir, leur soit en ce contredit ou obicé par qui que ce soit en aucune manière et que ces présentes, pour greigneur approbation soient enregistrées en la Chambre de noz Comptes et ou Trésor de nos Chartes et partout ailleurs où il appartiendra, se bon semble au dit sieur de Raiz et il le requiert.

 Et afin que ce soit chose ferme et estable à tousjours nous avons fait mettre à ces dictes présentes noustre séel.

Donné à Suly-sur-Loire, ou mois de septembre, l'an de grâce MCCCCXXIX, et de noustre règne le septiesme.

 [Sur le replis :] Par le Roy, en son conseil, ouquel l'évesque de Séez, les sires de Lebret, de la Trémoïlle, de Trèves, de Gaucourt et de Mareuil et autres estoient.

J. LE Picart. Société d'archéologie et d'histoire de la Mayenne.

1429, septembre, château deSully-sur-Loire. Original, Archives de la Trémoïlle et imprimé par M. le docteur Hébert dans son Gilles de Rays, Brest, 123 p. in-8.

La célèbre lettre du 8 juin 1429, écrite de Selles-en-Berry, conjointement par Guy XIV et André de Lohéac auprès de Charles VII.<=.... ....==> 1430, 20 juin, Machecoul. Lettres par lesquelles Gilles de Laval-Retz se reconnaît débiteur de son cousin Guy XIV de Laval

Sur la Terre de nos ancêtres du Poitou - Aquitania (LES GRANDES DATES DE L'HISTOIRE DU POITOU ) - 

En lisant l'histoire du Poitou , les faits qui appartiennent à celle de France et d'Angleterre y reviennent si souvent, qu'il faut absolument recourir à l'une et à l'autre si l'on veut vraiment comprendre ce qu'on lit Les Gaulois habitant le Poitou s'appelaient les Pictons; de là le nom de Poitou, Poitiers............